我俾人包咗........

我尋日俾人"包"咗.........幾粒鐘.......

個客係一個月前經香港去紐西蘭玩,

second visit 再嚟香港玩兩日至返荷蘭.

本應我話教佢哋搭地鐵自己去玩,

但佢兩公婆係都要"包"起我.

我帶咗佢哋去D例牌地方...

黃大仙 - 志蓮靜院 - 花墟 - 雀仔街

佢哋覺得志蓮靜院同黃大仙好唔同 !!!

志蓮靜院令你有一種寧靜同安詳嘅感覺 !

但黃大仙太金碧輝煌, 太煙, 太嘈, 太多表叔...........太多太多..........

行完廟輪到我哋祭"五臟廟",

去咗荷李活廣場裏面嘅一間豉油西餐廳,

3個 set lunch連貼士都唔使10 歐羅,

個荷蘭叔叔猛話抵.

成個行程用咗五個半鐘,

如果佢真係响 travel desk 度 book 呢個 private tour,

起碼要 200 蚊歐羅.

我就帶佢哋搭地鐵,

仲只係"篤"咗佢四粒鐘錢,

連埋車錢都係收咗佢哋70 蚊歐羅,

幫佢哋慳咗唔小.

兩公婆講咗不下幾十次 thank you !

攪到我都有D唔好意思 !

因為我有收錢嘛 !!

最後叔叔仲醒多 10 蚊歐羅貼士俾我 !

仲話下次有朋友嚟香港一定叫佢哋"包"起我喎 !

我就係俾佢哋"包"起咗......嗚嗚