係咪玩嘢

尋日一場 "黑雨" 令我响機場呆等咗四粒鐘

我入機場前已經 check 咗 "機管局" 我班機會準時 6:20 pm 到香港

點知我去到機場睇 "水牌" 時發現唔到我班機

上去航空公司一 check 之下

原來因為 "黑雨" 嘅關係

好多之前 "起飛" 或 "降落" 唔到嘅機都排住隊等 "升降"

攪到我架機準時到香港都冇位 "降落" 而被迫飛咗去廣州

最後 8:45 pm 至 "降落"........但等到 9:25 pm 至泊到埋 "閘口"

見到個客嗰陣已經 10:20 pm

返到酒店已經 11:00 pm.......仲要陪佢哋去買 "麥當奴"

我返到屋企都十二點幾

本來三個鐘內攪掂可以返埋屋企嘅 order

足之要六粒鐘至攪掂

天呀.......下次我要接機嗰陣可唔可以唔好玩嘢呀

係咪蘿柚痕 ???

好耐冇試過送早機

今朝四點九起身......只係用咗 15 分鐘裝身就 "飛的" 去酒店

好彩尋晚 call 定的士

我唸係"交更" 嘅關係.......今朝沿途見唔到一架的士........如果冇車就死得啦 !

其實個客尋晚七點至到香港

但今朝一早就搭機走

我攞 order 時已覺得奇怪點解佢嚟一晚就走

原來佢想幫兩個女慶祝生日

而其中一個女因為會留响上海做嘢半年

尋晚係佢哋行程最後一晚一家人聚埋一齊食飯

所以就算咁遠水路佢都要嚟一晚

原來佢有咁嘅原因

如果唔係我真係以為佢 "蘿柚痕"

"痕" 都唔緊要.......唔好攪到要我咁早起身囉

天有不測之風雲

今日三點接咗個商務團

人客由司機响深圳送嚟香港

本來我係响酒店接佢哋行個 tour 之後再送佢哋去機場

點知一等就等咗個半鐘

個客嚟到話唔係好舒服

想响 Lobby Lounge 飲杯茶坐陣

我咪坐响度陪佢哋傾計

坐坐吓開始落大雨

個客最後決定邊度都唔去

問我可唔可以直接送佢哋去機場

當然可以啦......咁我咪可以早 D 收工囉

正當開車嗰陣至知掛咗 "黑色暴雨"

沿途大雨到差 D 睇唔到前面架車

因為司機响大陸嚟唔熟路

所以佢揸得好小心

車速限制 80 km/h......佢揸 60 km/h 喳

你睇過青馬橋嗰陣大雨到矇查查.......但個天仲好光

過咗一半橋個天就變哂色.....唔通真係黑雲落黑雨

強迫英語團

尋日第一次帶大陸遊客

不過唔係嗰 D "強迫" 購物團

我一向都唔帶大陸客.......除咗因為我唔識 "煲冬瓜" 之外.......我最怕要迫客買嘢

但呢團 "商務團" 有 D "特別"

係一個爸爸帶住自己個女同埋朋友兩個女嚟旅行

"用心良苦" 咁想 D 女練習聽 & 講英文

所以至 book 咗我呢個講 "爛英語" 嘅導遊........真蠢

我同佢哋講我唔識講 "煲冬瓜"

但啱啱都放膽用 "好爛" 嘅 "煲冬瓜" 同佢爹哋傾計......佢居然明我講乜喎

我話如果今日你哋唔講英文......大家就會 "相對無言"

起初佢哋只係聽而唔夠膽講.......話唔知點表達至正確

我話只要你夠膽講.......唔需要介意自己嘅 "文法" 啱唔啱

就算唔係完整句子都唔緊要

只要用簡單易明嘅英語令對方明白就可以

因為我哋唔係 "演講".......只係 "傾計"

呢 D 說話唔係我講........係大部分外國人都係咁講 (由其係英文唔係佢哋母語嘅外國人)

我就話應該係佢哋聽唔明我嗰 D "爛英文"......所以咁樣講嚟安慰我就真

雖然最終都係我講多過佢哋講

但起碼佢哋肯踏出 "第一步" 嘗試用英文同我溝通

不枉佢爹哋 "一片苦心" 用咁多錢揾個英文導遊俾佢哋練習

誰的錯 ???

上星期五接咗個 "商務團" 要去 "羅湖火車站" 入境大堂等個 "大陸導遊" 帶四個客交俾我

我到咗羅湖即刻打電話俾個導遊話我响 "售票處" 等佢

佢當時話過緊關......但個客嘅證件有 D 問題......叫我等吓

等咗 45 分鐘我再打俾個導遊問佢响邊

佢答我响 "深圳" .......又話過緊關嘅 ????

再過 25 分鐘佢打俾我話已經上咗火車去緊紅磡

吓.......你攪乜呀???

明明 order 叫我响羅湖接團......明明你知我响羅湖等你

你做乜自己帶咗 D 客去紅磡...........你係咪玩嘢呀.........電話都未講完响邊度等我就收咗線

我即刻搭噃火車去紅磡

但個大陸導遊嘅電話一路都再打唔通

等到佢打俾我話响 Exit B 等我......我揾咗兩次都唔見

再揾埋 Exit A &Ｃ 都冇......揸住佢個 "名牌" 兜咗個大堂兩次

原來佢哋坐咗响大堂 "等候區".......大佬.....咁你唔好話我知你响 Exit B 等我啦

見到個 "導遊" 嗰刻我 "火" 都嚟埋

我直情 "質問" 佢點解唔跟 order 做嘢而自己帶個客嚟紅磡 

我 "嬲" 係因為佢嘅 "失誤" 會令個客以為我 "遲到"......以為我唔 "專業"

接咗佢哋之後行程安排去 "維港遊"

當我坐低同個 "導遊" 商量行程嗰陣

佢攞張 "行程表" 俾我睇

我發現成件事原來唔係咁

原來個 "導遊" 唔係 "導遊"

佢只係有個 "中文名" 嘅 "老" 人

係佢公司經旅行社安排大陸 & 香港行程

佢只係公司嘅職員招待班客而陪佢哋一齊嚟

而佢張 "行程表" 真係叫佢自己去紅磡

咁.....咁究竟係邊個嘅錯呀???

北京 Agent 定深圳 Agent 呢 ???

頭先我咪.....即係唔係發個 "導遊" 爛渣......而係發個 "客" 爛渣

响發現呢個 "大錯誤" 之後

我即時向個客 say sorry.........雖然 "錯不在我"

話可能幾方面溝通出現問題至攪錯咗

希望佢唔好介意

So far 呢兩日嘅行程都安排得 "妥妥當當"

我唸.......佢應該唔會 "投訴" 我啩

你見過未 ??

早兩日帶 "一個客" 行咗個九龍 Tour 之後就送佢去機場

本來行程只去黃大仙、玉器市場 & 雀仔街

但因為時間太多.......我唔想咁早送佢去機場要佢呆坐

所以我做好人加咗站金魚街俾佢

個客雖然係個亞伯......但好似大細路咁

去到金魚街間間舖頭都入去望吓

仲係咁同我講佢都有養邊種魚

後尾仲俾佢發現 "紋身魚" .....(最衰影咗張相都睇得唔清楚)

我見到條 "紋身魚" 紋咗紅綠色嘅花草、同埋普通圓點圖案

後尾又見到藍色嘅小龍蝦

呢個額外嘅景點行咗成 45 分鐘

連我呢個 "耐熱人" 都行到出哂汗

不過總算睇到 D 我未睇過嘅特色 "紋身魚" & "藍色龍蝦"

唔通佢哋係 Blue Blood 藍血貴族龍蝦