人細鬼大之求簽記

上篇 blog 講到我帶客去黃大仙,

由於黃大仙進行緊擴建工程,

主殿得噃小小地方,

連簽筒都唔可以外借.

攪到我要企响小小角落做講解.

當我解釋點樣求簽時,

得嗰 9 歲嘅小朋友顯得好有興趣,

猛問我佢求唔求得,

响得到佢媽咪眼神默許吓,

我就教佢將想問嘅問題响心度向神明講一次,

之後就搖個簽筒直至有支簽跌出嚟.

支簽嗰個號數係一個故事,

亦即係你要問嘅問題嘅答案.

佢好正經o甘跟足我講嘅嘢照做,

當支簽跌出嚟佢就係o甘問我支簽講乜 ?

見佢o甘"興致勃勃",

我咪私人買咗支簽文唸住解俾佢聽.

其實支簽係下下簽,

講個唔知乜嘢夫人歸西,

但聽到佢要問嘅問題之後,

我同佢 D 屋企人都"哈哈大笑" ,

你估吓佢問 D 乜 ???

佢問第日佢嘅老婆係邊個 ??

你話佢攪唔攪嘢呀 !

我又即時發揮我嘅"小宇宙",

答佢我知點解呢支係下下簽,

因為以你呢個年紀唔應該問呢個問題,

況且o甘樣問都唔會講到俾你知係邊個.

呢條問題根本唔成立,

所以大仙唯有俾個下下簽嘅指示你囉 !

佢 D 屋企人笑佢"人細鬼大",

小男孩唯有抓抓頭......尷尷尬尬响度陪笑.

我唯有安慰小男孩 - Just for Fun.