三十零蚊可以煮 D 乜 - 3

好耐冇玩過三十零蚊可以煮 D 乜

今日抽起條根想玩煮飯仔

即刻起動去街市買餸

豆腐 $4 , 豬肉碎 $5 , 豆卜 $4 , 鯪魚肉 $8 , 苦瓜 $4.5 , 紅菜頭 $1 , 冬菇 、木耳、素肉粒 $5 
全部材料總共 $31.5

麥片蒸肉丸 .....估唔到麥片加埋落 D 豬肉度味道都唔錯.....小咗啖啖肉嘅油膩感覺

鯪魚肉釀豆卜 

豆豉蒜蓉炒苦瓜素肉碎

紅菜頭酸辣湯 - 紅菜頭豆腐 , 木耳 , 冬菇 , 素肉碎

大家一定好奇怪我嘅酸辣湯點解會落紅菜頭.....

因為放工時見到走鬼檔嘅賣菜亞姐

我買兩棵油麥菜同兩個紅菜頭

亞姐俾夠三個兼搭多個好大嘅紅椒俾我都係收 $10

我見有個紅菜頭好細兼有 D 皺皮

所以咪切咗佢嚟加落煲酸辣湯度囉....哈哈

兩人食三餸一湯.....連飯都冇煮.....

除咗湯同苦瓜......豆卜同肉丸都食剩一半

開口中

尋日送兩個 Oversea Agent 去啟德郵輪碼頭接班大 group 出機場返大陸玩

我順口問佢哋知唔知班客係咪有簽証

不過我話如果真係冇都太遲

到咗機場我一直留守 check in counter 唸住等佢哋攪掂哂我至走

點知臨尾香.....真係有兩個客嘅 visa 有問題

原來兩公婆响兩星期前由加拿大飛去上海.....要住一晚至上郵輪

而家去大陸如果係過境性質唔超過 72 小時係唔使簽證

個客當然唔知.....入境時移民局亦唔知你留幾耐

所以就 stamp 咗佢哋嘅 visa

就係咁......佢哋就 check 唔到 in......咁佢哋走唔到時我亦走唔到

好彩我跟住冇嘢做......即刻帶佢哋落機場中旅社嘅 counter 做 visa

我記得以前做過.....最快上晝做....下晝有....但星期日冇得做

但真好彩....尋日最後一日可以做團體簽證

仲係下晝 5:00 有得攞.......兩個客仲可以趕到即日走

但中旅社想食咗人隻車......開價 $1300 一個人......離哂譜

之前 $1300 已可做獨立快證.....

明知人哋心急要走即噤住嚟搶......我最唔抵得呢 D 奸商

我即去第二間 Agent 度做.....人哋只收 $800 一個.....都係下晝攞

等佢哋攞咗 visa 我仲要幫佢哋撹機票轉班機

雖然每人要俾 re-booking fee US100  .....

但起碼慳咗酒店錢.....又唔使冇哂上海嘅行程都叫做有賺

佢哋仲話我係佢哋嘅 life-saver .....哈哈

足之 5:30 前撹掂哂 check 埋 in.......通知埋 Agent 搵 guide 接佢哋

佢哋卒之都鬆咗一口氣 

而我响個客同 Agent 眼中當然就係一個 professional guide 啦.....哈哈

不過我嘅星期日就白白報銷咗

生日小叙

30 - 3 - 2014

朋友生日決定帶她出走新界

要去當然去我最熟識嘅地方 - 赤柱

其實赤柱响假日真係好似去咗外國咁

俾你有一種出咗外渡假嘅感覺

海旁 D 餐廳 D 餐檯擺哂出街外

D 外國人好悠閒咁坐响度飲啤酒食嘢

响廣場外 D 小朋友有踩單車或踩 scooter.....亦有只走嚟走去

見到佢哋咁開心.....自己嘅心情都覺得舒暢

行咗一陣去咗美利樓嘅 King Ludwig Beerhall 食 tea buffet

$168 + 10% .....以赤柱嘅 standard 嚟講一 D 都唔貴

雖然選擇唔多....但有齊德國腸,沙律,湯,麵包,凍肉,海鮮,熱盆同甜品

仲有一人一碟自選材料醬汁嘅意粉.....D 嘢食味道都唔錯

 

buffet 包一杯飲品....仲可以叫啤酒

食飽飽我帶朋友仔去行海邊同百年老廟

响赤柱 hea 咗成日, 夜晚開始落雨

托朋友生日鴻福.....當日雖然冇太陽密雲.....但起碼到夜晚至落雨

仲係百年一遇落雹.....

朋友仔.....你睇你生日幾巴閉....連個天都幫你贈慶......哈哈

D 人企响度阻住哂我影靚景 :-p

唔通太大風吹走個拜神嘅碌柚 ?

呢個亞毛嘅坐姿應該係強國嚟, 佢坐响海邊...
唔係睇唔開吖嗎