高雄小琉球之旅 - 完結篇

16 - 4 - 2013 - Day 6
嚟到今日已經係今次旅程嘅尾聲

今日基本上冇咩地方要去

但又冇理由嘥咗呢大半日

所以又搵吓本旅遊書睇吓有咩地方可以去

呢幾日我哋來來回回 "高雄車站"

都唔知原來高雄車站有分為前站同後站

後站主要係成衣, 海味同玉石呢類批發貿易集散地

由於前站同後站有路軌分隔

如果往返兩邊.....响地面行嘅話要兜好大個圈

所以最方便就係响 2 樓買張 NT6 嘅 "月台票" 沿車站天橋行過去

我哋反正冇咩做......所以決定過去 look look

一入車站就見到呢間差唔多每個主要台鐵站都有嘅 "台鐵本舖" - 即係紀念品店


主要售賣台灣鐵路嘅紀念品同精品......其中以懷舊鐵道產品最受歡迎

上到二樓售票處以為要買飛.....最後唔使錢.....不過限定 20 分鐘一定要通過

其實台灣真係幾似大陸.....不過肯定比大陸乾淨

呢度大部分店舖都係賣男女時裝、童裝、精品.....好似香港嘅長沙灣批發市場

見冇咩特別又未食早餐.....所以去咗懷舊風味十足嘅 "驛站食堂" 醫肚

 

呢度好似 D 拍古裝片嘅地方咁真係好有懷舊風味

如果第日我有間屋裝飾成咁都唔錯喎
  

至於食物只係普通嘅台式小炒同粉麵之類.....冇咩特別

不過呢度嘅賣點係 "懷舊" 而唔係食物......所以我哋 no complain

回頭在車站又有另一間 "台鐵本舖"

   

門口有個 "鐵道員叔叔" 看舖.....仲細心到有埋檯响度俾你寫 postcard

經過二樓見到呢架由瓦通紙砌成嘅火車頭......好型仔呀

原來呢間 "紙箱王" 就係之前曾經為中環一間上海菜館打造咗成間紙造嘅店面

睇吓呢度 D 紙品幾型

噹噹 : 我要買呢隻搖搖馬返去

店裏面嘅吊燈全部都係紙製品

呢 D 紙製品全部只賣 NT150 -180 (HK$42 - $48)

個個都好靚.....但我只對巴黎鐵塔情有獨鍾

 
噹媽好鍾意呢份手信.....仲用咗三個鐘頭去砌......7 種顏色不停咁轉....型爆

我响度睇到唔捨得走.....唔覺唔覺蒲咗粒幾鐘

見到隔離間賣蕃薯乾嘅手信店即刻買支芋頭蕃薯雪條食....順便坐低抖抖

真係好香蕃薯芋頭味

我哋繼續由高雄車站向前行咗十零分鐘就到咗賣南北貨嘅集中地 - 三鳳中街

呢度咩都有.....海味、五穀雜糧、糖果餅乾、粉圓、蜜餞、肉乾.....真係要咩有咩

農曆年前好多人會嚟呢度辦年貨




我哋呢頭話個行李箱冇位擺......轉頭又忍唔到手買咗豬肉乾同蔬果條

睇到旅遊書介紹咗一間文具超級市場 - 九乘九

樓高 3 層.....由一般文具用品、美術用品到玩具精品都有

我好想去睇吓.....雖然明知冇嘢買.....朋友問咁做咩要去.....我想囉....唔得咩

最後我都買咗兩隻毛公仔俾老友記嘅囡囡做生日禮物

嚟咗咁多日都冇正式坐低嘆過咖啡......呢度 D 精緻切餅都係 HK$15 件.....味道仲幾好

時間差唔多....係時候返民宿攞行李去機場

一連六日嘅高雄小琉球之旅正式結束

今次係我寫旅遊手記最耐嘅一次

我都唔想.....但我都唔知自己 D 時間去咗邊

總之多謝大家捧場

為咗答謝噹媽辛苦咁睇住老媽咁多日......呢度 D 手信俾哂你