等......＞＿＜

等........

呢幾日我嘅工作就係等...等...等,

因為接咗個 job 係响酒店執客放車,

所以大部份時間都係坐响 Lobby 等,

尋日我坐咗兩粒鐘都冇見到一個客,

坐到張梳化都凹埋,

今朝又坐咗三粒鐘,

啱啱食完早餐轉咗場嚟 Starbucks 寫 Blog 同大家吹水,

一陣坐多二粒零鐘就收工,

終於可以結束呢幾日 "等" ＆ "坐" 嘅生涯！

日日有食神

食完海鮮餐同葡國餐,

印度太太話想試吓辣 D 嘅中國菜,

所以我帶佢哋去 "美麗華商場" 嘅 "雲陽閣" 食 "四川菜",

因為佢哋係信奉 Muslim.......要食 Halal Food,

所以每次去餐廳我都要吩咐佢哋唔可以落豬油、雞粉之類嘅嘢,

仲只係只叫海鮮.......因為肉類佢哋要誦過經至食得!

今餐由我發辦......食乜好呢?

前菜 - 酸辣椰菜.......太好味.....未影相我哋已經食咗一半!

素酸辣湯 - 因為要遷就個客 "走肉" !

麻辣粉皮 - Yummy!

糖醋魚香蝦球 - 呢味最唔得.....蝦肉霉嘅!

水煑魚片 - 印度太太至愛 !  我食咗隻辣椒乾.....辣到我耳仔出煙!

侍應哥哥最失敗嘅 "好" 介紹 - 什菜炒麵!

兩公婆食完都猛讚 Very Hot & Very Good!

佢哋响香港連澳門停留咗四日,

我就陪佢哋食足四日!

但係我一磅都冇增過......仲輕咗 1 kg !

因為我真係陪佢哋行足四日......唔瘦就有鬼喇!

佢兩公婆雖然係印度人,

但已經係第三代响 "莫桑比克" 土生土長,

所以一 D 都冇印度人嘅壞習性,

仲非常之有禮貌及客氣!

臨走除咗送咗盒朱古力俾我......Dark Chocolate with Truffe Fillings - "正"

仲係都塞咗 "A Piece Of Paper" 俾我自己買 "紀念品",

為咗 "多謝" 佢哋呢噃心意,

我亦 "禮尚往來" 請佢哋食 "Ben & Jerry's" 雪糕!

無牌導遊

明明係攞 "正牌" 嘅導遊,

點解 "無端端" 會變咗 "無牌導遊" 嘅????

因為我帶呢個客係响 "莫桑比克" Mozambique (鄰近非洲嘅小國) 嚟嘅印度人,

而佢哋嘅官方語言係 "葡萄牙文",

所以佢哋咪想去 "澳門" 睇吓囉!

但佢哋又唔想跟團o甘束縛,

所以我咪 "偷雞" 响澳門做咗一日 "無牌導遊" 囉!

出名景點我當然知响邊,

不過我都上網惡補咗 D 資料,

唔係點好意思收 Agent o甘多 Guide Fee 喎!

第一站我哋由碼頭坐的士去新馬路

一落車印度太太就俾呢間舊式布店 - "大永" 吸引咗入去,

  

仲買咗兩款唔同嘅絲質布料促進澳門經濟!

跟住我帶佢哋經 "市政廳" 行去 "大三巴"

佢哋猛話呢度 D "石仔路" 好有 "里斯本" Feel

印度太太知道影完相要行上去即刻笑唔出!

跟住行埋過 "大炮台",

點解唔見咗 "印度太太" 嘅?? 因為佢响 "城牆" 下已經 "投降" 喇!

打完扙當然要去醫肚,

我帶佢哋去 "老字號" - "沙利文" 食葡餐,

食乜當然由佢哋話事.......因為 "葡餐" 佢哋熟過我,

用鍋嚟上餐湯, 好似幾正宗喎!

我嘅至愛 - 脆卜卜嘅豬仔包

  

葡式蕃茄海鮮湯, 印度太太幫我加咗 Olive Oil, 所以碗湯睇落好油膩!

炸馬介休球, 鬆軟好味....."正" !

西洋燒魚

炒馬介休魚, 有 D 似我哋嘅炒桂花翅! 味道都幾好!

食完飯繼續做我嘅 "無牌導遊",

坐的士去 "媽閣廟" & "主教山",

遊客必然响廟前影呢 D "到此一遊" 嘅相!

去o甘多次澳門我都未上過 "主教山", 响呢度睇澳門全景真係好靚!

因為係平日嘅關係,

我知道會好難揾的士落山,

所以想叫上山架車等埋我,

但的士大佬話趕 "交更" 唔肯等,

最後我哋行落山坐巴士,

難得印度夫婦覺得坐巴士係一個好嘅體驗.......不知幾興奮!

巴士o甘啱停响 "新葡京",

我叫佢哋入去參觀吓!

後尾印度先生用 $100 拉 "老虎機" 就玩咗一粒鐘,

差唔多六點天都開始黑,

印度太太話好攰想返歸,

就係o甘我就結束咗一日嘅 "無牌生涯"

你睇佢哋幾恩愛!