身教

呢幾日我接待咗一家四口住响杜拜嘅"印度朋友",

佢哋應該屬於有錢嘅一族 - 坐商務位....住半島酒店.

雖然佢哋都有"遲到"呢個陋習.....但唔算嚴重.

而同佢哋相處呢幾日,

我睇唔到佢哋有 D 自以為有錢就大哂嘅氣焰.

反而從佢哋身上,

我睇到一個小朋友嘅教養,

真係要從小由父母"身教"開始.

事件一 : 嗰日我哋去参觀大佛,

Dad响小食部買咗 D 甜品,

個仔食咗舊煎堆一半就"靜靜雞"掉咗落垃圾桶,

Dad 見到好嬲就好輕力打咗亞仔一巴,

跟住好惡咁用印度文鬧佢,

足足幾分鐘後 Mum用英文話佢唔應該浪費食物,

因為响世界各地每分鐘都有人捱緊肚餓冇嘢食,

而你有嘢食已經好幸福.

最後我為咗打圓塲,

就叫亞仔向 Dad say sorry &講 never do it again.

事件二 : 亞仔同我傾緊計嗰陣突然問我?

你咁短頭髮究竟你係咪女仔嚟o家 ?

我咁靚女都仲要問???

講真我絕冇介意佢咁問我,

仲同佢玩答佢我唔係....

其實每次見到 D 客我嘅自我介紹開塲白都係 :

雖然我留咗好短嘅頭髮,

但我絕對係一個靚女嚟嘅 !

你哋千祈唔好認錯呀 !

通常 D 客都會哈哈大笑 !

而我又可以留低個深刻印象俾 D 客 - "醒"呢 !

但 Mum聽到即時用印度文"哦"亞仔,

我估大意係"鬧"佢冇"禮貌"呱 !

跟住亞仔即刻同我 say sorry,

但 Mum 仍然繼續"哦"到佢"頭 dum dum & 眼濕濕".

從以上兩件事當中,

我睇到佢父母好有"家教",

冇因為自己有能力而浪費.

而覺得個仔唔啱就即時糾正,

冇因為我唔介意就當冇事發生.

反觀現今大部分小朋友都俾父母縱壞,

有 D 父母甚至為咗補償佢哋冇時間照顧 D 小朋友,

D 小朋友要乜就買乜,

形成佢哋唔識珍惜,分享,

甚至做出自私嘅行為.

所以呢對"印度父母"嘅身教,

絕對值得其他父母作為借鏡.