小肥B

呢個肥 B 係咪好得意呢 !

隻手仔同腳仔都"一節節"好似"節瓜"仔o甘,

佢今日頂住個 Donald Duck 嘅小屁股响 Lobby 度走嚟走去,

攪到個個都停低同佢玩.

但响我一聲令下,

佢就俾爹哋捉咗入佢認為係嘅 BB 囚車入面,

我唔想o家........不過夠哂鐘開 Tour.

攪到亞肥 B "咿啞鬼叫"喊哂口 !

唔知係我太靚定係我把聲太甜美呢 ??

佢望住我講嘢之後好快就收哂聲兼望住我笑,

沿途我一路講就一路同佢玩,

亞肥Ｂ就不停o甘"咔咔大笑".

攪到我幾想好肉緊o甘咬佢幾啖 !

三皇兩后

淺水灣幾時都係o甘多人

尋日帶住一家四口(兩個小男孩)去到淺水灣嘅天后廟,

循例講解吓 D 佛像,

當我講解"多仔佛"嗰陣,

我對住個媽咪講話如果你想生個囡囡,

不妨摸吓個女仔頭.

但我就唔會做示範俾你睇!

孖寶兄弟

尋日帶咗一對嚟自美國嘅孖寶兄弟,

哥哥叫鄺德英 - 13歲,

細佬叫鄺德實 - 12歲,

佢兩個响美國學中文講"煲冬瓜",

個中文名係個中文老師幫佢哋改嘅,

佢哋已經差唔多學咗兩年中文,

所以已經認得好多簡體字,

仲識寫自己個名 !

當我講俾佢哋知我哋係講廣東話同寫繁體字,

佢哋即刻顯得好有興趣,

所以我教佢哋用繁體字寫自己個名,

仲教埋佢哋點讀 !

但因為廣東話有九個音節,

比起"煲冬瓜"難好多,

所以兩個小豆丁讀到"一舊舊"哂脷.

而家好多西方國家真係以中國為未來嘅強國....有好多商機,

所以不惜自小開始培育 D 小朋友學中文.

睇嚟我都要好好o甘練吓我嘅"煲冬瓜",

唔可以成日都只係識講 "喎嬸麽兜撥知到",

你哋知唔知我講乜呀 ????

人細鬼大之求簽記

上篇 blog 講到我帶客去黃大仙,

由於黃大仙進行緊擴建工程,

主殿得噃小小地方,

連簽筒都唔可以外借.

攪到我要企响小小角落做講解.

當我解釋點樣求簽時,

得嗰 9 歲嘅小朋友顯得好有興趣,

猛問我佢求唔求得,

响得到佢媽咪眼神默許吓,

我就教佢將想問嘅問題响心度向神明講一次,

PK

今日開 tour 嗰陣發生咗一段小插曲,

當我哋去到黃大仙露天停車場嗰陣,

司機哥哥啱啱停低車,

突然有個伯伯跌响我哋架車面前,

事先聲明唔係我哋撞倒佢.

我落車見到伯伯滿面滿咀都係血,

撑杆朗拿度

做咗導遊o甘多年,

都係第一次接觸到奧運選手,

當然多得奧運响北京舉行,

如果唔係點會有選手途經香港喎!

今日去信德中心接個客,

佢係由巴西嚟嘅"撑杆跳"教練,

因為支杆有 6M o甘長,

所以佢唔可以坐船由澳門直接去機場.

運送呢支杆都幾大陣象,

我要揾三個 porter 搬支杆落去停車場,

仲要用架 49 座位嘅車至載得到....因為支杆太長!

响車我猛"撩"個"撑杆朗拿度"傾計,

知佢未嚟過香港,

我仲送咗張"攝影小王子"影嘅山頂靚相俾佢做紀念!

而我落車前同佢影咗張相,

疲勞轟炸

本來今日要開個 full day tour,

就因為 8 號風球而取消咗 !

唸起都好彩,

尋晚送走咗班"搖頭黨"

如果係尋日掛嘅話,

我肯定俾班"搖頭黨"煩死.

我絕對冇"種族歧視",

只不過唔鍾意佢哋 D 唔理其他人嘅 "習性".

佢哋除咗鍾意 "遲到" 之外......最鍾意"每事問",

仲要係問完又問.....再問都係問同一個問題.

你幾好耐性都會俾佢問到 "炆".

唔食得唔得...

一連三日做一班 150人嚟香港開會,

又係住到山卡拉咁遠嘅搖頭黨.

日日 Full Programs.....餐餐包 Buffet.

我已經食咗好多餐 Buffet 喇 !

所以今晚去到 Indian Club 見到 D Buffet 都唔想食,

寧願返屋企食通粉 !

仲有聽日.....仲有一餐......救命呀 !

原來日日請你食魚翅,

你真係寧願食粉絲 !

尊重

前兩日酒店話想每個部門都認識酒店嘅 Market Tour,

所以專登叫我哋帶餐飲部同事行一次.

見到嗰班妹妹仔 & 哥哥仔,

我第一句就講 : 响呢區你哋可能熟過我,

亦冇興趣聽我發嗡風.

今日大家出現响呢度都係為咗交代.

所以我只會簡略講呢個 tour 嘅特點,

同埋每個 check point 我會講乜.

佢哋個個應該係放工後被迫參加呢個 "工餘活動",

所以都 "無可奈何" 咁跟我行.

行到去街市已經唔見咗一半人,

因為佢哋當正自己行緊街.....一路行一路傾,

完全冇理過我行咗去邊.