火燒喉嚨

今日落住毛毛雨,

幾希望 "Follow Me Tour" 冇客唔使做!

點知今日我又破記錄........有 30 個客......冇錯.......係 30 個 !!!!

大家想像吓如果响旅遊車我都冇可能由車頭嗌到落去車尾,

何況响條迫滿人嘅街上面,

加上落雨大家又担住遮,

我差幾乎嗌破喉嚨佢哋至聽到 !

當然今日o甘 "虛撼" 就吸引唔小 "好事之徒" 圍觀喇 !

最後連警察叔叔都 "眼睥睥" 睇吓我响度做乜,

莫非佢見到我揸住支 "白旗"........又着住件 "Follow Me",

以為我响度 "非法集會" 叫 D 人跟住我一齊攪 "示威" !!!

去到尾聲好彩冇走甩 D 鴨仔

但我個喉嚨已經好似火燒o甘,

我聽日仲要踩 Full Day Tour,

希望唔會失聲喇 !

真假和尚

今晚個 Follow Me Tour 成十幾個人,

每次人多當我停响度講嘢嗰陣,

總係吸引咗 D "八卦" 嘅人停响度睇吓我响度講乜 ???

我發覺我越嚟越有 "潛質" 做明星,

因為俾o甘多陌生人望住我,

我都可以唔覺尷尬望都唔望佢哋 !

話唔定我去做明星唔只有人 Follow Me.......仲有人 Stay With Me  !

今晚我仲吸引咗個 "假和尚" 埋嚟,

企圖向我班客 "假化緣" .......伸個 "砵" 埋嚟問攞錢 !!!

職業操守

尋日响 Park Hotel 送班 Party 走,

因為佢個 Lobby 裝緊修,

所以我叫 D 客自己攞行李落嚟,

如果叫 Bell Boy 幫手都只係推 D 行李過對面馬路,

最辛苦仍然都係司機大佬,

因為佢要托 D 行李入行李廂.

所以我一心唔叫 Bell Boy 就係想將 D 行李費俾咗司機.

唔知係咪 D 租車公司嘅司機做到麻目定 "側側膊" 唔想郁手,

佢由得 D 客自己抬 D 行李入行李廂,

自己就 "Q"埋雙手响度睇,

我唯有同佢講幫幫手,

仲即時額外俾咗 $100 行李費俾佢,

佢就即時蓮子蓉o甘嘅面口兼快手快腳搬行李.

其實而家做工邊有話唔辛苦 !!!

但都應該有自己嘅 "職業操守",

斷唔能夠因為辛苦就 "卸膊" !!

雖然佢嘅服務態度我大可以照叫佢搬行李而 "斗零" 額外費用都唔使俾佢,

但我明白到旅遊車司機捱更扺夜,

又要搬搬抬抬........揾嘅都係辛苦錢!

所以都體諒到佢哋嘅苦處嘅 !

Follow Me

大家點睇我呢件新背心呢 !!!

市面上冇得賣o家 !

呢件風褸質地嘅背心,

睇落又唔算好難睇.......都應該接受到嘅 !

係背後呢個字難頂 D 啫 !

我做 Walking Tour 嗰陣要着住呢件"馬騮衣",

容乜易係人都 Follow Me o家 !

頭先我一做完個 Tour 就即刻除都除唔切 !

南丫島 - 圖片集

我响南丫島嘅索罟灣行到去榕樹灣,

沿途影咗好多相,

不過我 D 相冇攝影技術可言,

純粹 "隨心" 覺得角度靚就影.

睇相當陪我行山喇 !

唔收導遊費兼唔使俾貼士!

例牌影張地圖先

南丫島 - 漁民文化村

下星期我要帶團去南丫島參觀 "漁民文化村",

平時帶團去南丫島多數係夜晚去食餐海鮮餐就走. 

但今次呢個文化村連我自己都未去過,

為免到時俾客問到我 "口啞啞",

所以今日自己走咗一轉去 Look Look.

因為間 Travel Agent 已經單咗聲俾"天虹海鮮酒家"知我會去睇睇,

所以我唔使俾入場費兼有私家駁艇坐.

睇咗半粒鐘影完相就坐噃駁艇返碼頭.

我見一場嚟到咪順便當行山行去榕樹灣,

沿途風景真係好靚!

坐船返歸嗰陣仲見到好靚嘅"咸蛋黃".

呢隻私家駁艇今日淨係載我一個 !

天譴大懲罰

為咗安撫老媽失落嘅心情,

呢三日我哋陪佢"香港自由行",

日日十點零就出發......玩到六點零至返歸.

真係"早車去, 晚車返"

24-11-08  - Day 1 :

帶老媽去咗 Revolving 66 旋轉餐廳食 Buffet,

講真成日帶團去都知 D 嘢唔好食,

但以 $108 + 10% 有o甘靚嘅 views 睇就乜都抵噃哂 !

跑馬地全景

死狗

今日個 Walking Tour 團中有三個中國人,

本應我想"側側膊"用英文講 Tour,

點知响我介紹完自己之後,

其中一個男人用英文問我可唔可以同時用廣東話解釋,

因為佢姊姊唔識英文.

由於呢個團係可用中、英、日語,

所以我唯有 Nicam 雙語廣播.

平時講 Tour 我可以口沫橫飛, 口水多過茶,雞啄唔斷, 吹水唔抹咀, 講到天下無敵.........

靚太唔易做

近排城中娛樂熱門話題非富豪 D 女友莫屬,

不過我當然唔會响呢度講呢 D o甘敏感嘅話題喇 !

你估我唔驚俾人告咩 !

只不過佢哋令我唸起前幾日帶嗰個"靚太",

雖然係靚 & 老公有錢,

但睇落佢一 D 都唔開心.

每次見佢同個老公講嘢都"誠惶誠恐",

好似好驚會得罪個老公.

記得行 Tour 嗰日我哋上到珠寶廠,

亞"靚太"睇中咗個玉吊咀,

想個老公俾意見,

但個老公坐响度睇都冇睇就講咗句 : 我覺得你可以自己做決定,

"靚太"好無奈講咗句令我印象好深刻嘅說話 : How much can I spend ?

上得更高....行得更遠

尋日再上山頂.......今日仲上得更高,

又坐 360 纜車上昂平大佛,

去到本來唸住 " Pi "甩對夫婦等佢哋自己行上去睇大佛,

點知個肥老公話佢唔行,

叫個老婆自己上去,

o甘我唯有話陪個老婆行上去喇 !

奸計唔得逞......本來唸住去嘆噃碗山水豆腐花嫁嘛 !

今日山上天氣好涼.....冇太陽兼有 D 霧,

反正"亞太"行得慢,

我咪"拎"架相機出嚟周圍影囉 !

個天"灰蒙蒙" 有 D 霧 !

人生百態

响兩日內我總共上咗三次山頂,

唔知係咪天陰陰灑咗一場雨嘅關係,

已經唔係上兩個禮拜嘅"秋高氣爽",

而係有一種"濕涼"嘅感覺 !

我係嗰 D 鍾意企埋一角睇盡"人生百態"嘅人.

因為好多時從睇到嘅人和事之中都對我帶團有幫助.

前晚嘅山頂唔算多人,

但 D 情侶就好似去咗北極o甘,

成條"孖條"o甘黐埋一舊 !

差 D 睇錯以為係"一頭三手四腳"嘅怪胎 !

早晨的一刻

人算不如"機"算,

今朝班機早咗成粒鐘"撻"落嚟,

又預唔到時間坐通宵巴,

所以摸黑已經到咗機場 !

 05 : 40 AM 機場未天光的一刻

秋高氣爽之無聊對話

呢排差幾乎隔日就上山頂,

可能係秋天嘅關係,

真真正正感受到秋高氣爽 、風和日麗嘅感覺 !

以下係我今日同個西班牙 Guide 嘅無聊對話 :

小導遊 : Hi, Spanish.....早晨 !

Spanish : Hi, 小導遊.....早晨 !

小導遊 : 嚟咗好耐嗱 !

Spanish : 一陣啫 ! 今日天氣真係好, 好舒服 !

小導遊 : 如果唔係帶住客, 我實坐响露天茶座嘆吓咖啡, 睇吓書, hea 噃個下畫.

Spanish : 我都係o甘話, 仲要戴埋太陽眼鏡"索"吓女 !

小導遊 : "索女" 係咪你哋男人嘅指定動作呢 ?