六四....適逢十五

尋日六四適逢舊曆十五

雖然我冇去維園嘅燭光晚會

但我心同大家一樣....

希望有朝一日能平反六四.....民心不滅....民主萬歲

既然唔殺生....尋日响屋企煮咗 "三餸一粥" 陪老媽食飯

(老媽成日投訴得自己一個人食飯.....你估我哋真係唔使做咩)



南瓜粟米紅米粥 - 有益正氣



粟米椰菜木耳蒸粉包 - 凍食熱食一樣咁正



蒜蓉莞茜蒸茄子 - 賣相雖然唔係咁靚....但味道 OK 喎



蜜糖豆炒素肉丸 - 我用咗炸蒜蓉辣椒一齊炒......



因為素肉丸係贈品....所以呢餐三餸一粥唔使 $20

Hea 之旅 - 高雄墾丁遊完結篇

9-3-2012 - Day 6
今日係我哋 "Hea 之旅" 最後一日

食過早餐我哋就搭捷運去 "橋頭糖廠"

"橋頭糖廠" 創建於 1901 年日治時期.....已經有百幾年歷史係台灣第一間新式機械嘅製糖工廠

糖廠响 1999 年已經停產

而 2002 年經 "高雄市政府" 公告為 "法定古蹟"



荒廢咗嘅糖廠外貌
 

 

呢度好似 D 電視劇拍綁架槍戰嘅地方

而糖廠而家亦變為一個休閒觀光嘅好地方

團體機構甚至可以預約嚟糖廠乘坐小火車參觀

廠區亦會安排 "導賞員" 解說糖廠嘅發展歷史

呢度大部分嘅建築都充滿日式風格

仲供奉咗觀音响呢度俾當時嘅員工參拜

周圍亦掛滿 "祈福" 嘅木牌

呢個 "鐵園迷城" 係由糖廠廢棄設備再生嘅 "裝置藝術群"

 

園內有詳細介紹各種零件....好多藝術群都造得好精緻好靚

 

參觀完 "鐵園迷城" 後仲見到有個 "向日葵花田"

呢朵向日葵仲大過 "小菇囡" 個頭

我招積噹都唔執輸影噃張相先

行咗半朝鬼咁肚餓....食杯雪糕後就搭捷運去搵食

朋友睇咗旅遊書介紹呢間 "金城鴨肉麵" D 鴨好好食

鍾意食咩自己隨便點....有侍應姐姐幫你攞埋枱

我哋一人叫咗一碗鴨肉麵之外....

我仲點咗鴨頭、鴨頸、鴨腳等等......味道又真係唔錯喎

食完嘢仲去咗轉 "家樂福" 買手信至返民宿攞行李預備去機場

响 "高雄車站" 坐捷運去機場都唔使 30 分鐘.....真係話咁快就到
 

呢個係舊 "高雄車站"....就响新車站隔離

話咁快六日五夜 "高雄墾丁遊" 就完結

今次亦係我寫 "旅遊 Blog" 最耐嘅一次.....足足寫咗一個月至寫完

話明今次係 "Hea 之旅" 當然我就 Hea 住寫啦

多謝大家嘅耐心捧場

希望好快又可以再寫 "旅遊 Blog" 啦.....ByeBye

Hea 之旅 - 高雄墾丁遊 5

8/4/2012 Day 5

今朝我哋嘅行程係去 "旗津"

一早嚟到 "美麗島捷運站" 趁冇咩人就快快趣影咗 D 相

呢個站嘅天花 "光之穹頂" 充滿藝術氣色

係由意大利藝術家水仙大師（Narcissus Quagliata）親手打造


睇吓幾 colourful

另外仲有呢幅 3 D 插畫我唔記得係咪都喺 "美麗島站" 影

我係咪好似企响邊邊位就跌落去咁呢

好驚跌落去呀....我 D 演技得唔得呢

玩咗一陣我哋坐捷運去到 "西子灣站"

本應我想租單車周圍去....但朋友姐姐唔識踩單車

最後唯有漫步去 "西子灣風景區"

由呢條西子灣隧道入口可行到中山大學嘅入校車輛管理站

呢度好似香港咁有條海濱長廊

我哋千辛萬苦行咗幾十級樓梯至上到 "打狗英國領事館"

由高處遠望西子灣風景區

呢間領事館建於 1865年, 係外國人响台灣建造嘅第一座領事館, 號稱全台灣第一楝洋樓

呢度嘅拱式走廊，極具英式建築風格

呢間領事館屬於國內二級古蹟........响 74 年復修後開放俾遊客參觀

陳列包括有人文及地理歷史背景及其他台灣文物史料....古今景觀照片、建築模型、打狗抗日砲戰圖等等

臨走仲俾招積噹發現好大隻蜘蛛

離開 "打狗英國領事館" 後我哋行咗去渡輪碼頭搭船過 "旗津"

估唔到連油鼓都畫到咁靚

唔使十分鐘船程就到旗津港

大家都好肚餓唸住醫肚先

行到去旗津渡輪站前嘅 "廟前街海鮮店"

隔幾步路就有海鮮店老闆向我哋招手話每盤 NT100平價海鮮

我哋求其入咗間海鮮店叫咗五、六樣海鮮連汽水啤酒都係 NT800....抵到爛

九層塔炒海瓜子

香芹炒鯊魚肉....同石班肉冇咩分別

九層塔炒螺肉....好爽脆....有咬口

西芹炒鯊魚皮....呢度嘅鯊魚皮唔夠後碧湖咁爽

上次去台北導遊介紹過呢種山蘇葉.... 好好味

話就話叫燒魚鮫....實際係燒魚肉...no good

食飽飽就去租咗架 "家庭單車"

我唔想租呢種o家....但冇得揀....因為要載埋朋友姐姐

我哋跟住地圖踩....第一站去到 "旗津星空隧道"

聽講呢條星空隧道以前係軍事用嘅防空洞

經市政府改造後變為 "旗津踩風大道" 其中一個景點

隧道嘅路上鋪咗長長嘅木棧

裏面有夜光彩繪....牆上面仲畫咗唔少嘅壁畫

 

 

 
呢度 D 壁畫真係畫得好靚

穿過隧道後嘅隧道全景

隧道外沙灘

又俾招積噹發現一舊 "猿人嘅人面石"

呢度望過對岸就係西子灣

之後我哋踩車經過 "旗津海岸公園"....冇停低只路過

最後嚟到 "旗津風車公園"

呢個公園係高雄市亦都係全國第一座觀光、休閒兼環保嘅風力發電休閒公園

公園面積7.5公頃....園內設置咗七座造型別具特色嘅三葉式風車

發電足夠供應整座園區夜間照明約 4小時



公園仲有好多呢 D 貝殼同魚類雕塑

小菇囡俾蟹拑....so poor

仲有我同招積噹企响度睇咗好耐浪.....D 浪拍岸時超澎湃

係咪好勁呀

因為我哋只係租咗兩個鐘單車

就算好 "依依不捨" 都要走....因為要趕去海產街買手信

呢 D 切開哂嘅魚周圍都有烏蠅 "溜" 過....俾我都唔買

三傻猛咁試人哋 D 魷魚同魚乾

明明唸住踩完單車就去食多輪海鮮....我都未食魚生同蟹

但神推鬼撞之下我哋還完單車就跑去碼頭趕船....冇得食啦

因為攞住好多手信....所以我哋返咗民宿抖一抖至去 "瑞豐夜市" 掃街

原來呢個夜市逢星期一 & 三都休息....大家有機會去就記住啦

德國鹹豬腳.....點解唔係豬手嘅

炸蜥蟀

掃完瑞豐我哋仲去埋六合掃多輪

有得食唔好俾佢停

待續.....