我係 Cheap 精

我個小導遊牌响呢個月尾就到期,

今日帶哂 D 證書唸住去續證

正當我要交 Form 嗰陣見到張 Memo 寫住 30/6 前交 Form 續證費 $300......1/7 之後交 Form 只需 $150

我問個職員點解相差一日就差咗 $150

佢話財政年度响 1/7 後調整咗價錢

其實大部分嘅導遊證都係响 30/6 到期

如果你要慳 $150 嘅話......即係話你响 1/7 就唔可以帶團

返正我 1/7 冇接到 order.......無理由俾多 $150 啫

所以我今日冇續證

$150 夠我食 6 個早餐.......或者 4 個午餐......又或者睇 3 場戲......再或者捐咗去都仲得

但無端端要俾多 $150 就總覺得唔抵

一句講哂......係我 Cheap....唔想俾多 $150

擺烏龍

等我講噃早兩日開 Tour 嘅烏龍事

嗰朝去到灣仔 "豬流感酒店" 接咗個客就 call 司機埋車

點知佢話叫我行出嚟.....佢响紅綠燈前面等我

我周圍望都唔見佢架車

咪住......紅綠燈.....唔通司機大佬去錯九龍嗰間 "沙士酒店"

我即刻話我响灣仔喎.......佢話....吓乜唔係九龍咩

我問司機大佬幾耐至可以到......佢話最快都要 25 分鐘

好彩今日得一個客

我即刻 "執生" 坐的士去纜車站

反正要包個客坐一程纜車

我無謂响酒店等咁 "傻"

我仲同個客講咗個 "善意" 嘅 "大話"

話架車 "爆呔" 要坐的士......不過去完山頂架車會响山頂等我哋

咁究竟今次係邊個嘅錯呢?

我接到個客就緊係唔關我事啦!

但都唔關司機大佬嘅事喎

"罪魁禍首" 嘅係......租車部門嘅大佬

原來最初個 order 真係响 "沙士酒店"

不過後尾改咗 "豬流感酒店"

但係佢唔記得改噃張 order 紙

所以咪擺咗呢個 "烏龍" 囉

一於屈佢請食飯

水晶包

我今日要講嘅 "水晶包" 並唔係潮州出名甜點 "水晶包"

因為呢個 "水晶包" 只得東涌至有

平時去 D 出名嘅舖頭食 "小籠包" 就排哂長龍

但東涌呢個 "水晶包" 嘅 "特式" 就係唔使排隊兼有專人服侍你

而且最多只可以俾十個人享用

究竟乜嘢 "水晶包" 咁 "巴閉"......

咪係........昂平 360 嘅 VIP "尊享號"........簡稱 "水晶包" 嘅 "水晶車包廂" 囉!

繼早前試過 "水晶車廂" 之後

今次個客仲 "巴閉" .........直情包架 "水晶車廂"

去到車站即有專人幫你入車票、戴手帶

如果你有十個人......又想試吓呢個 "水晶包" 嘅話

多謝盛惠 $2,900........價錢仲包埋 "靈猴影院" & "與佛同行" 兩個節目

相比起只買來回 "水晶車廂" 車票.....價錢只係貴幾十蚊

又可以做噃次 VIP......簡直抵到爛啦

不過最抵嗰個當然係我啦.......唔使錢就做 VIP

坐完仲可以 Keep 噃呢張 VIP 咭留念 

淪陷

呢兩日我終於親身體會到電視劇講 D 人响 "走難" 時 "爭先恐後" 又上唔到車或船嘅場面

事緣尋日我去碼頭接班坐 "遊輪" 返嚟嘅船客

平時接 D 外國遊客都好守秩序一團團落船

但尋日我接嗰班係 印度 "搖頭黨"

佢哋 "一窩蜂" 咁殺出嚟

都唔知邊團打邊團

成個 "海運碼頭" 好似"淪陷" 咗

我都懶理咁多......反正我接第 30 團

有排都未輪到我架車

我咪同其他差唔多團號嘅導遊坐响 Pacific Coffee 吹水

最後由六點等到十點半至開車

上到車我個 Guide Seat 當然俾佢哋霸咗

個 "咪" 又俾隔離車攞埋

所以我放大喉嚨講完要講嘅資料後就索性坐响樓梯級同司機大佬吹水

好彩响車已經派哂鎖匙

所以返到酒店我即 "閃"

今日做接送迪士尼

佢哋又 "表演" "淪陷" 嘅場面

一批批人衝埋架車門度......拍架車門叫你開門

起碼有十幾人堆埋一齊迫上車

無論男或女、老或幼都唔讓步

天啊......十幾架車响度等你哋......唔知你哋迫乜嘢呢????

下次我接團都係要問清楚

如果又係幾百人嘅 "搖頭一族" 嘅話......

我寧願响屋企 "吽臭" 好過