音樂細胞

尋日帶咗一家六口响南非嚟嘅黑人家族,

最攪鬼嘅係四個仔女之中年齡相距 18 歲,

就連爹哋媽咪個樣頂多都係四十幾,

但大仔已經 24 歲,

難得亞哥又肯同細佬妹玩到癲哂!

尋晚我哋上咗 "Bauhinia Dinner Cruise",

裏面有一隊 "Philippino Live Band",

食完飯亞妹自己出咗舞池跳舞,

由於亞妹舞技了得.......音樂節拍 & 節奏感強勁,

所以受 "小賓女" 邀請上台一齊跳舞!

亞妹時不時扭動身體做出高難度動作

連 "小賓女" 都 "自愧不如" !

台下更加拍爛手掌!

架船泊岸嗰陣亞妹仲 "意猶未盡" 唔想走!

唔通個個黑人嘅音樂細胞都係o甘勁嘅!

9 歲嘅細佬 & 6 歲嘅亞妹!

食穀種

呢排我都冇乜講過 "導遊手記",

因為踏入十二月開始,

除咗 Follow Me Tour.........我都冇開過工

曾經有 Blog 友私人留言問我.......做導遊係咪可以揾好多錢

第二個我就唔知......我就一定係全行最窮嘅 Guide!

因為佢話睇咗我講一日或一個 Job 就揾好多

而家就等我解答吓你哋嘅疑團喇!

冇錯有時我 "一日" 或 "一個 Job" 係揾多小小,

但係.......係 "一日" 唔係 "日日",

仲有 "一個 Job" 可能係嗰個月嘅 "唯一" 一個,

我哋呢行唔係日日有工開,

而 12 月至 3 月仲係我哋 Market 嘅 "淡季",

所以 "坐冷板" 或 "食穀種" 嘅日子都唔小!

我揾嘅錢同你哋可能差唔多,

唯一令你哋 "羨慕" 嘅係我 "放假" 嘅時間比你哋多,

又冇頂頭老細 Head 住我,

最緊要嘅就係........我嘅 "收入" 係冇包要俾老細 "無理取鬧" 囉!

雞同鴨講

上星期除咗做咗團 "搖頭黨" 之外,

仲接咗個 "羅馬尼亞"團,

最攪笑嘅係個 Organiser 原來唔識英文.......o甘邊個做翻譯呀 ???

好彩有一對夫婦識英文,

如果唔係真係 "雞同鴨講"

呢班客大部分都係生意佬,

其中一個仲係 Best Western Central Hotel 嘅老細,

今次嚟香港係半商務半旅遊,

所以行程第一站就係去 "羅馬尼亞領事館"

本應唸住 "攝" 時間去食早餐,

點知個客話 "領事" 邀請埋我一齊上去,

吓........咪玩喇......我又唔識聽你哋講乜......我上去做乜喎 !

坐响個偌大嘅會客室,

佢哋不停 "嘻嘻哈哈",

我就坐响度發 "白日夢" !

本來佢哋有麵包蛋糕招待我哋,

但班客食飽早餐又點會食喎

我望住 D 蛋糕......吞哂口水........但又唔好意思食喎

唯有飲杯咖啡止住肚餓先!

差唔多响領事館坐咗成朝至正式行 Tour,

但成個 Tour 我都唔使點講嘢,

反正佢哋最想都係去 Shopping 而唔係 Sight-Seeing !

唔知攞住呢份資料係咪可以免費入住呢間羅馬尼亞嘅酒店呢 ???

原來中國同羅馬尼亞建交咗 60 週年喇!