開籠雀

呢兩日氣温高達三十幾度,

我連續兩日都要行 tour,

一行出條街簡直想死,

照計應該冇乜 mood 至係,

但今日接到班 "即捕即戒" 嘅荷蘭兄弟,

我又好似 "開籠雀" 咁講過唔停,

可能係今日班客唔使領隊做翻譯,

我可以 "一氣呵成" 咁講我想講嘅嘢,

唔使講吓又停吓咁冇癮.

有個客仲讚我對香港好熟悉,

我答佢因為佢對香港唔熟,

所以咪 "以為" 我好熟囉 !

跟住我哋一齊 "哈哈大笑"!

其實我老媽話我細個嗰陣,

D 老師話我成日都皺埋個眉頭,

一句嘢都唔講,

又唔同 D 同學仔玩,

仲以為我係 "啞" 嘅 !

所以年年嘅評語都係 "沉默寡言",

真係估唔到依家我會揀咗一份成日都要面對唔同嘅人,

仲要係成日都要講嘢嘅工 !

而自己仲好 enjoy  !

你話奇唔奇怪吖 !

香港特產

D 客成日問我香港有乜嘢特產,

或者係有乜嘢可以代表香港,

佢哋好想買一樣留為紀念.

我 "抓爆頭" 都冇唸到有乜嘢係有 香港特色",

龍呀 !鳳呀 !嗰  D只可以話代表中國.....但代表唔到香港.

比較有香港特色嘅咪 D 街頭小食囉 !

但唔通叫佢哋買 D 食物返去放冰柜......雪硬佢當藝術品咩 !

終於俾我唸到一樣.........攪鬼嘅香港特產...(純屬個人意見)

呢樣嘢唔貴......體積大過張咭片小小,

但隱藏嘅價值......

可以好細........亦可以係你同我都估唔到 ???

特務零零 Guide

﹔估吓呢舊係乜東東 ?

偷聽器? 助聽器? 通話器定係藍牙耳機???

今朝我見到呢舊嘢都眉頭一皺,

心唸唔係吖嗎?

要我揸住舊咁嘅嘢咪破壞哂我 "高貴" 嘅形象???

估到未呀???

急才

今晚帶住班 "荷蘭兄弟"去 Dinner Cruise,

開車嗰陣都冇落雨,

點知去到碼頭想落車嗰陣就好似倒水咁,

全車 26 人得幾個人有 "遮",

仲差 10 分鐘架船就開,

我即時決定有 "遮" 嘅就跟我行,

冇 "遮" 嘅就冇得去...........住,

我先帶有 "遮" 嘅客行去碼頭,

再帶噃哂 D "遮" 返轉頭接另一批客.

啱啱趕得切開船前到碼頭......唔使送船尾 !

食完飯上車仲問噃 D 客知唔知點解臨落車會咁大雨 ???

佢哋當然話唔知喇 !

我話係上天想考驗吓我有冇應變能力,

所以至咁大整蠱..........你哋 !

我話好彩我又有 "急才" 攪掂咗咋 !

我又响度兜個圈 "讚" 自己 !

死未!

充實的一天

今朝 06:20 送早機,

跟住趕 08:30 响尖沙咀開 tour,

最衰班芬蘭佬遲到........趕到我甩轆,

好彩司機大佬等埋我,

唔係就變咗係我遲到.

最後仲趕得切食個早餐至開工.

今次個 tour 要去行半山自動電梯 & 西港城.

由於條電梯响 06:00 -10:00 係向下落,

所以"我"被迫陪佢哋向上行.

行咗 1/3 我已經由 "面濕到落底底", 

好彩行剩 1/3路程佢哋自己話夠皮.

跟住去西港城等咗 10 分鐘至開門,

其實乜嘢鋪頭都未開,

我哋偷偷行咗上大舞台酒樓睇佢個 Dancing Floor,

真係幾有 D 夜總會 feel.

同個客傾計至知原來佢係想睇 "街市",

係賣魚,賣肉,賣菜"濕立立" 嗰 D 街市,

而唔係呢個 "Western Market".

我唯有教佢自己去雀仔街嗰陣,

順便慢慢行去奶路臣街嘅旺角街市喇.

今日嘅 Schedule 幾充實.

早餐 - 送早機.

Brunch - 開 tour 加响 Jumbo 食 lunch.

Late Afternoon Tea - Walking Tour.

Late Supper - 迪士尼執客返酒店.

依家我返咗屋企攤抖吓,

順便寫吓 blog 兼睇吓錄影帶至再出去搏殺.

傷痕累累

係咪好攪笑呀 !好似貼封箱膠紙咁 !

呢兩張相係我 28/6 接機嗰陣影嘅 !

堂堂一個國際機塲,

居然落雨嗰陣漏水,

枉佢仲得過幾年最佳機塲大獎,

俾 D 旅客見到個機塲貼哂膠布,

真係笑大人哋個口,

不過總好過幾年前法國嗰個機塲 "lum" 咗嘅!!!!!

佢依家都係"割"親吓啫 !

應該好快可似埋到口嘅 !