超級無敵....估佢做乜 ???

連續兩日 06:00 order,

尋日收工返屋企大昏迷咗十幾粒鐘.

今日又精精神神去開工.

當我坐响度等客嗰陣,

圖中嗰位 "艷女郎" 忽然响我唔夠兩呎範圍內用佢嘅 "虎背熊腰" 得住我,

如果我係一個 "血氣方剛" 嘅 "死靚仔",

或者係一個 "猥猥瑣瑣" 嘅 "麻甩佬",

我見到佢呢身 "迫爆身" 嘅" 超短迷你裙" 打扮.....一定流哂鼻血.

可惜我唔係呢 !

我只係响度唸:

唔怪得熱天特別多強姦非禮案喇!

眼睥睥

今日我俾好多人"眼睥睥",

因為落住大雨我仲停响條街講嘢!

開始行 tour 嗰陣都係落住微微細雨,

點知未行到去街市已經傾盆大雨.

有一家四口又冇帶遮,

但佢哋又話唔介意濕身要繼續行.

每當我停响 D 擋攤講解嗰陣,

我哋一行九男女就圍成一個傘海.....變相阻住咗人哋,

所以人人行過都 "眼睥睥",

D 目光直情係覺得我哋阻住個地球轉,

大佬呀 ! 我都唔想 !

我夠想 D 客 cancel 唔去咯 !

反正有冇客去 tour 我都有 Guide Fee 嘅!

咁但係 D 客要去,

我就要做嘢嫁喇!

唔通齋行唔講嘢咩!

所以我今日 "硬食"咗好多 "狠毒嘅眼光" !

模範 VS 衰格

今日做兩轉 order 都係"搖頭黨".

其中一家五口出發去海洋公園只係遲咗 5分鐘算係準時.

落車前我"兇"定佢哋先,

Pick up 嗰陣如果遲到架車唔會等.

因為佢哋响度買咗 Sim Card,

所以一夠鐘我即刻"奪命追魂 call "佢哋 !

最後佢哋只係遲咗 10 分鐘咋 !

破哂"搖頭黨"記錄,

真係想頒個"最佳模範" & "最準時"獎俾佢哋 !

另外嗰兩公婆就衰到無倫,

我好小咁"嬲爆"咁話D客,

約咗兩點 pick up 送佢哋去迪士尼酒店,

佢哋居然兩點至"施施然"揸住一袋,二袋返酒店.

上房攪到 2:25分至落嚟,

仲要我哋車佢去餐廳攞外賣,

因為個 order 我係代人哋做,

嗰個 guide 又唔想俾個 agent 知,

所以問咗司機話冇所謂就車佢去.

其實車公司有權 charge 多D錢,

因為 order 係點對點,

唔應該有 extra stop.

當我响車提佢送機嗰日要準時,

嚇佢話架車超時 15 分鐘有權走,

佢居然"串"爆話佢俾咗好多錢,

就算佢遲到我哋都要等佢.

我即時"火"都嚟埋,

雖然明知你哋呢D民族嘅特性係"遲到",

但你估真係有錢大哂呀 !

咁有錢就唔使一毫子都唔"醒" Bell Boy 喇 !

我笑住咁用噃"串爆"嘅語氣答佢,

我做咁多國家嘅遊客都好準時,

你哋係第一對客遲咗咁耐,

當然我係老作喇 !

我話對香港人嚟講,

Time is Money !!!!!

因為你哋嘅遲到,

令到我同司機做唔到下一轉 order,

即係你令我哋今日唔見咗好多錢.....

所以記得送機嗰日唔好喇 !

當然我仲係用"笑"住嘅表情同佢哋講喇 !

佢哋即時收聲兼扮聽唔到 !

最憎 D 客扮哂嘢兼以為俾咗小小錢就大哂,

你 "串" 咩我仲 "串爆" 過你 !

至多唔做 Professional Guide 一日咁多喇 !

超勁黑雨

今朝零晨三,四點已經聽到勁嘈嘅雨聲,

攪到我都冇覺好瞓,

起身冇耐個客打嚟問個 tour 可唔可以改期,

咁嘅天氣唔開好過開,

況且黑雨之下保險唔會 cover,

當然俾佢延期喇 !

雖然下晝唔使開 tour ,

但我朝早要送機喎 !

黑雨下嘅尖沙咀

去到酒店聽到禮賓部話去機塲條路封咗,

因為山泥傾瀉.....沙石淤塞排水道,

所以攪到水浸大塞車.

我即時當危機處理,

call agent 通知佢哋我用機鐵走,

未見過機鐵站咁多人,

尤其係去到青衣站,

D 人揸住一件二件行李湧上車,

都係第一次見機鐵都企滿哂人.

途中見到塞咗一大條車龍,

响機鐵內影到嘅車龍

响報紙借用嘅相

D私家車 & 貨 van直情浸到差唔多過車頂!

可惜我响機鐵影唔到相 !(電視好似有影到 !)

真誇張 !

11:00响東涌嘅天色 !

頭先响地鐵無端端摸到條褲由 pet pet 濕到去大脾,

原來我擺响袋嘅水"漏水",

攪到我個袋D嘢濕哂,

已經由零晨到依家都未停過雨,

依家仲要"自己濕自己",

使唔使咁樣幫我慶祝"蛇一"呀 !

騰雲駕霧

早幾日响滂沱大雨加雷暴警告下,

我帶住一家四口嘅"搖頭黨"勇闖昂平360,

其實坐過 360 幾次,

但每次睇到嘅景色 & 感覺都唔同.

有時風和日麗.....有時搖搖欲墜.....有時呼呼風聲,

但今次就比較特別,

開首 1/3 路程有小小密雲,

中段灑咗一陣雨,

尾段我哋俾一層層白濛濛嘅霧包圍住,

好有騰雲駕霧嘅感覺.